زۆر لەمێژە تاسەی ناوەندێکی چاپ و بڵاوکردنەوەی کوردی لە کوردستاندا بووەتە خەونی سەرەکی زۆربەی ئێمە. ناوەندێک کە بتوانێ پێ بە پێی ناوەندەکانی هاوشێوە لە ناوخۆی ئێران و کوردستان، بە شێوەیەکی شاره‌زایانه‌ و بە کواڵیتی بەرزەوە دەست بداتە چاپ و بڵاوکردنەوەی بەرهەمی سەرکەوتوو و بەپێزی هونەر و ئەدەبیات و زانستی مرۆیی بە زمانی کوردی. چ هی نووسەرانی خۆماڵی و چ نووسەرانی جیهانی. ئەم خولیایە زۆرتر لەو دۆخەوە سەرچاوەی گرتوە کە ئێستا ڕووبەری گشتی کپ و بێدەنگی کتێبخانەی کوردی تەنیوەتەوە. دەکرێ بگوترێت خەساری سەرەکی ئەم دۆخە بریتییە لەوەی کە بواری کولتوور و کتێب کەوتوەتە دوای زۆربەی کایەکانی دیکەی ژیان و چوەتە پەراوێزەوە. بەڵام ئەم دۆخە قەیرانێکی بێ چارەسەر نیە، واتە بووژاندنەوەی پانتایی چەقبەستووی خوێندنەوە لە کوردستان کارێکی ئەستەم و نەکردە نیە، بەڵکوو بەرهەمی بەپێز و سەرکەوتوو دەتوانێ ڕەوت و ئاستی خوێندنەوە و ڕۆشنبیری لە پانتایی گشتیدا بگۆڕێ یان بەخێرایی بەرەو پێشی بەرێت.