زه‌وق و هه‌‌ستى هونه‌‌رى پێويستييان به‌‌ سۆز و خۆشه‌‌‌ويستى خه‌‌‌ڵكه‌‌، پێويستييان به‌‌وه‌یه‌‌ لێيان تێبگه‌‌‌ى و هه‌‌ستيان پێبكه‌‌ى، كاتێك له‌‌ ئامانجه‌كه‌‌ت نزيك بوویه‌‌وه ‌ئه‌وكات ده‌بينى كه خه‌ڵكی گه‌لۆر و خراپ‌‌ چ هه‌ڵسوكه‌وتێكت له‌‌گه‌‌ڵ ده‌كه‌‌ن. وه‌به‌‌ر تانه‌ و ته‌شه‌رانت ده‌ده‌ن و به‌‌ چاوێكی سووك چاو له‌‌ هه‌‌موو ئه‌و به‌رهه‌مانه‌ش ده‌كه‌‌ن كه‌‌ به ‌‌ره‌نجى شانت و به‌‌ ئاره‌قه‌‌ى نێوچاوان و هه‌‌ژارى و برسێتى و شه‌‌‌ونخوونى وه‌ده‌ستت هێناون‌. هاوڕێ ناڕاسته‌قینه‌كانت ئیتر نابنه‌‌ هانده‌ر و دڵگه‌‌رميت و ناشبنه‌‌ مایه‌‌ى هێوری و خه‌‌‌مخۆريت. ئه‌وان هه‌رچی باشی‌ و جوانى له‌‌ تۆ دایه‌‌ به‌‌ خۆتی ناڵێنه‌‌وه‌، به‌‌ڵكوو به‌‌پێچه‌‌‌وانه،‌‌ ئه‌وان له‌‌ رووى حه‌سوودی و چاوچنۆكییانه‌‌وه‌ له‌‌ كایه‌‌ك كێوێكت بۆ دروست ده‌كه‌‌ن و لێفه‌ له‌‌سه‌‌ر هه‌‌تيوانت هه‌‌ڵده‌ده‌نه‌‌وه‌. ئه‌وان جيا له‌‌ عه‌يب و عاره‌كانت هیچ شتێكی ديكه‌‌ت پێ ناڵێنه‌‌وه‌، له‌‌ هه‌ر جێیه‌‌ك له‌‌ته‌‌‌‌رێك بده‌ى يان تووشی هه‌‌ڵه‌یه‌‌كى بچووكيش بی، به‌‌ دزيیه‌‌وه‌ لێت هه‌‌ڵده‌گرنه‌‌وه‌ و لێت له‌‌ هه‌‌ڵڵا ده‌ده‌ن و نه‌هێنییه‌كانت ئاشكرا ده‌كه‌‌ن و دوور له‌‌ چاوى خۆت به‌‌ سووكایه‌‌تى و بێڕێزيیه‌‌وه‌ لاساييت ده‌كه‌‌نه‌‌وه‌ و چێژ له‌‌ هه‌‌موو ناكامى و نامراديیه‌‌كانت وه‌رده‌گرن.